Ushbu darslik jahon tarixining qadimgi davridan 1918-yil birinchi jahon urushining tugagunga qadar bo‘lgan davrini qamrab oladi. Italiyalik ma’rifatparvar olimlar insoniyat tarixining bu davrini «qadimgi tarix», «o‘rta tarix» va «yangi tarix» kabi qismlarga bo‘lib o‘rganishni taklif etgan.

Bu darslikni o‘rganish davomida turli xalqlarning kundalik hayoti, xo‘jalik faoliyatlari, iqtisodiy va siyosiy taraqqiyotini kuzatasiz va bizgacha saqlanib kelayotgan mashhur me’morchilik obidalari, saroy, madrasa, masjid hamda ibodatxonalar haqida tasavvurga ega bo‘lasiz. Bundan tashqari Vatanimiz va jahonning mashhur olimlari faoliyati bilan tanishasiz.

Darslik 4 ta bob, 53 ta mavzudan iborat bo’lib, akademik litseylarning chuqurlashtirilgan fan yo’nalishlari uchun mo’ljallangan. Berilgan ma’lumotlarning o‘zlashtirilishini yengillashtirish maqsadida har bir mavzu so‘ngida nazorat savollari va topshiriqlar berilgan bo’lib, ularning aksariyati mustaqil fikrlash, mantiqiy xulosalar chiqarish singari qobiliyatlaringizni o‘stirishga yordam beradi. Topshiriqlar − nazariy bilim va amaliy malakalarni oshirib borishga, tarixiy davrlarni bevosita kuzatib, birinchi jahon urushining tugagunga qadar jahon mamlakatlarida yuz berayotgan o'zgarishlar bilan tanishga, eng avvalo, bu o‘zgarishlarni, tarixiy voqealarni chuqur idrok qilib, tafakkur tegirmonidan o‘tkazib, undan mamlakatimizda yangi, qudratli demokratik jamiyat qurishda foydalanishga hamda uni milliy istiqlolga xizmat qildirishga yo‘naltirilgan. Bular orasida soddalari bilan birga, sizdan diqqat va fikr-mulohaza talab qiladigan murakkabroqlari ham mavjud.

Insoniyat tarixining uzoq davom etgan va ushbu majmuada jamlangan qismini yaxshiroq tushunish va anglash uchun tushuncha va sanalar bilan birga, zarur paytlarda lug‘at, xronologik jadval, xarita va boshqa yordamchi vositalardan foydalanish tavsiya etiladi. Ushbu darslikni yaratishda so‘nggi yillarda nashr qilingan adabiyotlardan foydalanildi.

Darslik tarixiy voqealarga oid rasmlar, chizmalar, atamalar izohlari, sinf va uy vazifalari bilan to‘ldirilgan.